"ގުޅިގެން ބަދަލެއް: ގެވެށި އަނިޔާ ހުއްޓުވުމަށް އިޖާބަދިނުމުގައި ބާރުވެރި މުޖުތަމައެއް ބިނާ ކުރުން" މި ޝިޢާރުގެ ދަށުން ފެމިލީ ޕްރޮޓެކްޝަން އޮތޯރިޓީއާއި ޔުނިސެފް ގުޅިގެން، ނޮވެމްބަރ 25 ން 26 އަށް ބޭއްވި މަހާސިންތާ ނިންމާލައިފިއެވެ. މި މަހާސިންތާ ނިންމާލުމުގެ ރަސްމިއްޔާތުގައި ފެމިލީ ޕްރޮޓެކްޝަން އޮތޯރިޓީގެ ބޯޑުގެ ރައީސް އަލްފާޟިލް އަހްމަދު އަންވަރު މާހާސިންތާގެ ބައިވެރިންނަށް ގެވެށި އަނިޔާ ހުއްޓުވުމަށް ކުރާ މަސައްކަތްތައް ފާހަގަކޮށް އެކަމަށް ޝުކުރު ދަންނަވާފައިވެއެވެ.  

މި މަހާސިންތާގައި ގެވެށި އަނިޔާ ލިބިފައިވާ ފަރާތްތަކަށް ޚިދުމަތްދިނުމުގައި "ވިކްޓިމް ސެންޓްރިކް ނަޒަރިއްޔާ" އެއް ގެންގުޅުމުގެ މުހިންމުކަމަށް ވަނީ އަލިއަޅުވާލާފައެވެ. އަދި މިހާރު އަމަލުކުރެވެމުންދާ ގެވެށި އަނިޔާ ހުއްޓުވުމުގެ 3 ވަނަ ޤައުމީ ސިޔާސަތުގެ ޖޮއިންޓް އެކްޝަން ޕްލޭން ތަންފީޒުކުރުމަށްޓަކައި އެއްބާރުލުން ދެވޭނެ ގޮތްތަކާއި ބެހޭގޮތުންވެސް ވަނީ މަޝްވަރާކުރެވިފައެވެ.

މި މަހާސިންތާއަކީ ސަރުކާރުގެ މުއައްސަސާތަކާއި މަދަނީ ޖަމުޢިއްޔާތަކާއި ގުޅިގެން މަސައްކަތް ކުރުމަށް އެޅުނު މުހިންމު އެއް ފިޔަވަޅެވެ. މާހާސިންތާއިން ލިބުނު މައުލޫމާތުގެ ތެރެއިން ގެވެށި އަނިޔާ ހުއްޓުވުމަށް ދެވެން ހުރި ޚިދުމަތް އިތުރަށް ހަރުދަނާކުރުމަށްޓަކައި ޚިދުމަތް ދިނުމުގައި އެންމެ މަދުމިންވަރަކަށް ހިފަހައްޓަންޖެހޭ މިންގަނޑު ތަކަކީ ކޮބައިކަމާއި، އަނިޔާ ލިބޭ ފަރާތުގެ ނަޒަރިއްޔާތުން ނުވަތަ 'ވިކްޓިމް ސެންޓްރިކް އެޕްރޯޗަކުން' ގެވެށި އަނިޔާގެ މައްސަލަތަކުގައި އިޖާބަދިނުމުގައި މަސައްކަތްތައް ބައްޓަންކުރެވިދާނެ ގޮތާއި،  މައްސަލަތައް މުއައްސަސާތަކަށް ހުށަހަޅާ ހިނދު ބަލަން ޖެހޭ 'ރިފަރަލް ޕާތްވޭ' އަދި ވިކްޓިމް އެޑްވޮކަސީ ނުވަތަ 'އަނިޔާ ލިބޭ ފަރާތުގެ ހައްގުތައް ރައްކާކުރުމަށް ވަކާލާތުކުރުން' ރާއްޖޭގެ ތައާރަފްކުރަން ކުރެވޭނެ ކަންކަމާމެދު މަޝްވަރާ ކުރެވިގެން ގޮސްފައިވެއެވެ. މީގެ އިތުރުން ގެވެށި އަނިޔާ ހުއްޓުވުމުގެ 3 ވަނަ ޤައުމީ ސިޔާސަތުގެ ތެރެއިން މަދަނީ ޖަމުޢިއްޔާތަކުން ކުރެވެން ހުރި މަސައްކަތްތަކާއި ދައުލަތުގެ މުއައްސަސާތަކާ ގުޅިގެން ކުރެވޭނެ ކަންކަން ރޭވިފައިވެއެވެ.

މީގެ އިތުރުން މި މަހާސިންތާ ނިންމުމުގެ ރަސްމިއްޔާތުގައި ގުޅިގެން މަސައްކަތްކުރުމަށް ފެމެލީ ޕްރޮޓެކްޝަން އޮތޯރިޓީއާއި (އެފްޕީއޭ) ސޮސައެޓީ ފޮރ ހެލްތް އެޑިޔުކޭޝަން (ޝީ) އާ ދެމެދު މިއަދުވަނީ ފަހުމުނާމާއެއްގައި ސޮއިކޮށްފައެވެ. މި ފަހުމުނާމާގެ ދަށުން، ގެވެށި އަނިޔާ އަދި ވަކި ޖިންސަކަށްވީތީ ކުރާ އަނިޔާއާއި ގުޅިގެން އޮތޯރިޓީއަށް ހުށަހެޅޭ އަދި ރިފަރ ކުރެވޭ މައްސަލަތަކުގައި، ކައުންސެލިންގ، ސައިކޯސޯޝަލް ސަޕޯޓު އަދި ޕޭރަންޓިންގ ސެޝަންތަކުގައި ބައިވެރިވުމަށް އެދޭ ފަރާތްތަކަށް ޝީއާއި ގުޅިގެން ޚިދުމަތް ފޯރުކޮށްދެވިގެންދާނެއެވެ. އަދި ހަމައެޔާއެކު، ގެވެށި އަނިޔާ އަދި ވަކި ޖިންސަކަށްވީތީ ކުރާ އަނިޔާއާއި ގުޅޭ މައްސަލަތަކުގައި، އަނިޔާގެ އަމަލުތައް ހިންގާ ފަރާތުން ކައުންސެލިންގގެ ޚިދުމަތަށް އެދޭ ހާލަތުގައި، އެފް.ޕީ.އޭ އާއި ގުޅިގެން ޝީ އިން އެފަރާތްތަކަށްވެސް ޚިދުމަތްފޯރުކޮށްދޭނެއެވެ.

މި މަހާސިންތާގައި އޮތޯރިޓީއާއި ގުޅިގެން މަސައްކަތްކުރި ފަރާތްތަކުގެ ތެރޭގައި ސަރުކާރުގެ މުއައްސަސާތައް ކަމުގައިވާ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާއި، ދިވެހި  ފުލުހުންގެ ހިދުމަތާއި، އަދި ނެޝަނަލް ސެންޓަރ ފޯ މެންޓަލް ހެލްތް އަދި ނެޝަނަލް ޑްރަގް އޭޖަންސީ ފާހަގަކޮށްލަމެވެ. މި މަހާސިންތާގައި ރާއްޖޭގެ އެކި ކަންކޮޅުތަކުން 15 މަދަނީ ޖަމިއްޔާ ވަނީ ބައިވެރިވެފައެވެ.