ގެވެށި އަނިޔާއާ ދެކޮޅަށް މަސައްކަތްކުރާ މަދަނީ ޖަމުޢިއްޔާތައް ބައިވެރިވާ "މަދަނީ ޖަމުޢިއްޔާތަކުގެ މަހާސިންތާ" ފެމެލީ ޕްރޮޓެކްޝަން އޮޓޯރިޓީއިން މިއަދު އިފްތިތާހުކޮށްފިއެވެ. ވަކި ޖިންސަކަށް ވީތީ ކުރާ އަނިޔާއާ ދެކޮޅަށް މަސައްކަތް ކުރާ 16 ދުވަހުގެ ކެމްޕޭން ފާހަގަކުރުމުގެ ގޮތުން މި އަހަރު ކުރިޔަށް ގެންދާ އެންމެ ބޮޑު އެއް ހަރަކާތަކީ ފެމިލީ ޕްރޮޓެކްޝަން އޮތޯރިޓީއާއި ޔުނިސެފް ގުޅިގެން ބާއްވާ މަދަނީ ޖަމުޢިއްޔާތަކުގެ މަހާސިންތާއެވެ.  މި މަހުގެ 25 ވަނަ ދުވަހުން ފެށިގެން 26 ވަނަ ދުވަހުގެ ނިޔަލަށް ކުރިޔަށްދާ މި މަހާސިންތާގައި  ރާއްޖޭގެ އެކި ކަންކޮޅުތަކުން 15 މަދަނީ ޖަމުޢިއްޔާ  ބައިވެރިވެއެވެ. މި މަހާސިންތާ ޝަރަފުވެރި ކޮށްދެއްވައި ހުޅުއްވާދެއްވީ މިނިސްޓަރ އޮފް ސޯޝަލް އެންޑް ފެމެލީ ޑިވެލޮޕްމަންޓް ޑޮކްޓަރ ޢާއިޝަތު ޝިހާމްއެވެ.

މި މަހާސިންތާގެ މިއަހަރުގެ ޝިޢާރަކީ "ގުޅިގެން ބަދަލެއް: ގެވެށި އަނިޔާ ހުއްޓުވުމަށް އިޖާބަދިނުމުގައި ބާރުވެރި މުޖުތަމައެއް ބިނާ ކުރުމެވެ". ހަމައެހެންމެ މި މަހާސިންތާގެ މައިގަނޑު މަގުސަދަކީ ގެވެށި އަނިޔާ ހުއްޓުވުމަށް މަސައްކަތް ކުރާ މަދަނީ ޖަމުޢިއްޔާ ޖަމާޢަތްތަކާއި ގުޅިގެން މަސައްކަތް ކުރުމަށް ދިމާވާ ދަތިތަކަކީ ކޮބައިތޯ ދެނެގަނެ، އެ މައްސަލަތައް ހައްލުކުރުމަށް ހަރުދަނާ ގޮތެއްގައި މަސައްކަތްކޮށް، ދެމެހެއްޓެނިވި ބަދަހި ގުޅުމެއް ސަރުކާރުގެ މުއައްސަސާތަކާއި ޖަމިއްޔާތަކާމެދު ގާއިމުކުރުމަށްޓަކައި ބޭއްވާ މަހާސިންތާއެކެވެ.

މި މަހާސިންތާގެ އަލީގައި ދައުލަތުގެ އެކި އިދާރާތަކާއި މަދަނީ ޖަމުޢިއްޔާތަކާއި ގުޅިގެން މަސައްކަތްކުރެވެން ހުރި ފުރުސަތުތަކާއި، އެކުގައި ކުރެވޭނެ މަސައްކަތްތަކާއި، އަނިޔާ ލިބޭ ފަރާތްތަކަށް ޚިދުމަތްދިނުމުގައި ގެންގުޅެންޖެހޭ މިންގަނޑުތަކާއި ހިފަހައްޓަންޖެހޭ އުސޫލުތައް ހިއްސާކުރެވިގެންދާނެއެވެ. ހަމައެޔާއެކު މި މަހާސިންތާގައި އަނިޔާގެ ޝިކާރައަކަށްވާ ފަރާތްތަކަށް ހިދުމަތް ފޯރުކޮށްދިނުމުގައި ބައިނަލްއަގްވާމީ ޖަމުޢިއްޔާތަކުގެ  ތަޖުރިބާތައްވެސް  ހިއްސާކުރެވިގެންދާނެއެވެ.  

މަހާސިންތާ ހުޅުވާދެއްވުމުގެ ގޮތުން ޝަރަފުވެރި މެހެމާން، މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑޮކްޓަރ އާއިޝަތު ޝިހާމް ދެއްކެވި ވާހަކަފުޅުގައި ވަނީ، ސަރުކާރުގެ އެންމެ ބޮޑު އެއް އަމާޒަކީ އަނިޔާ ލިބޭ ފަރާތްތަކަށް އަވަސް މިނެއްގައި ފެންވަރު ރަނގަޅު ޚިދުމަތް ލިބޭނެ އިންތިޒާމް ހަމަޖައްސައިދީ އެފަރާތައް ލިބިފައިވާ އަނިޔާއިން އަރައިގަތުމަށް ބޭނުންވާ އެހީތެރިކަން ފޯރުކޮށްދީ ރައްކާތެރި މާހައުލެއް ކަށަވަރުކުރުން ކަމަށް ވިދާޅުވެފައެވެ. މިކަމަށް މަގުފަހިކުރުމުގެ ގޮތުން ގެވެށި އަނިޔާ ހުއްޓުވުމުގެ ގާނޫނީ އޮނިގަނޑު އިތުރަށް ހަރުދަނާކޮށް ފެމިލީ ޕްރޮޓެކްޝަން އޮތޯރިޓީއަކީ ޚިދުމަތްދޭ ފަރާތްތައް ޖަވާބުދާރި ކުރުވާ މަރުކަޒު ކަމުގައި އެކަށައެޅި ގާނޫނީ ނަންބަރު 2012/3 (ގެވެށި އަނިޔާ ހުއްޓުވުމުގެ ގާނޫނު) އަށް ގެންނަންޖެހޭ އިސްލާހުތައް ގެނައުމުގެ މަސައްކަތްތައް ފެށިފައިކަމަށް މިނިސްޓަރ ވަނީ ވިދާޅުވެފައެވެ. ހަމައެހެންމެ އަނިޔާ ލިބޭ ފަރާތްތަކަށް ބޭނުންވާ އިޖުތިމާއީ، އިގްތިސާދީ، މާލީ އަދި ގާނޫނީ އެހީތެރިކަން ފޯރުކޮށްދޭ ޖަމިއްޔާތަކުން ކުރަމުންދާ މަސައްކަތްތައް ފާހަގަކޮށް އެފަރާތްތަކަށް ޝުކުރުދެންނެވިއެވެ.

މި މަހާސިންތާގައި އޮތޯރިޓީއާއި ގުޅިގެން މަސައްކަތްކުރާ ފަރާތްތަކުގެ ތެރޭގައި ސަރުކާރުގެ މުއައްސަސާތައް ކަމުގައިވާ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާއި، ދިވެހި ފުލުހުންގެ ޚިދުމަތާއި، އަދި ނެޝަނަލް ސެންޓަރ ފޯ މެންޓަލް ހެލްތް އަދި ނެޝަނަލް ޑްރަގް އޭޖަންސީ ފާހަގަކޮށްލަމެވެ. މި މަހާސިންތާގައި 15 މަދަނީ ޖަމުޢިއްޔާ ބައިވެރިވެއެވެ.