ގެވެށި އަނިޔާ ހުއްޓުވުމަށްޓަކައި ނޮވެންބަރު 25 ވަނަ ދުވަހުން ފެށިގެން 26 ވަނަ ދުވަހުގެ ނިޔަލަށް ކުރިއަށްދިޔަ މަދަނީ ޖަމުޢިއްޔާތަކުގެ މަހަސިންތާގައި، ގުޅިގެން މަސައްކަތްކުރުމަށް ފެމެލީ ޕްރޮޓެކްޝަން އޮތޯރިޓީއާއި (އެފްޕީއޭ) ސޮސައެޓީ ފޮރ ހެލްތް އެޑިޔުކޭޝަން (ޝީ) އާ ދެމެދު ވަނީ ފަހުމުނާމާއެއްގައި ސޮއިކޮށްފައެވެ.

މި ފަހުމުނާމާގައި އެފްޕީއޭގެ ފަރާތުން ސޮއެކޮށްފައިވަނީ ޗީފް އެގްޒެކެޓިވް އޮފިސަރ އާމިނަތު ޝިރާނީ ނަޢީމް އަދި ޝީގެ ފަރާތުން، އެ ޖަމިއްޔާގެ ބޯޑުގެ ވައިސް ޗެއަރޕަރސަން ޢާއިޝަތު ނޫރާ މުޙައްމަދުއެވެ.

އެފްޕީއޭއާއި ޝީ އާ ދެމެދު މި ވެވުނު ފަހުމުނާމާގެ ދަށުން، ގެވެށި އަނިޔާ އަދި ވަކި ޖިންސަކަށްވީތީ ކުރާ އަނިޔާއާއި ގުޅިގެން އޮތޯރިޓީއަށް ހުށަހެޅޭ އަދި ރިފަރ ކުރެވޭ މައްސަލަތަކުގައި، ކައުންސެލިންގ، ސައިކޯސޯޝަލް ސަޕޯޓު އަދި ޕޭރަންޓިންގ ސެޝަންތަކުގައި ބައިވެރިވުމަށް އެދޭ ފަރާތްތަކަށް ޝީއާއި ގުޅިގެން ޚިދުމަތް ފޯރުކޮށްދެވިގެންދާނެއެވެ. އަދި ހަމައެޔާއެކު، ގެވެށި އަނިޔާ އަދި ވަކި ޖިންސަކަށްވީތީ ކުރާ އަނިޔާއާއި ގުޅޭ މައްސަލަތަކުގައި، އަނިޔާގެ އަމަލުތައް ހިންގާ ފަރާތުން ކައުންސެލިންގގެ ޚިދުމަތަށް އެދޭ ހާލަތުގައި، އެފް.ޕީ.އޭ އާއި ގުޅިގެން ޝީ އިން އެފަރާތްތަކަށްވެސް ޚިދުމަތްފޯރުކޮށްދޭނެއެވެ.

މި ފަހުމުނާމާއަކީ އަނިޔާ ލިބޭ ފަރާތުގެ މަސްލަހަތު ރައްކާތެރިކުރުމުގެ ނަޒަރިއްޔާތުން، އެފަރާތްތަކަށް ބޭނުންވާ އިޖުތިމާއީ އަދި ނަފްސާނީ އެހީތެރިކަން ފޯރުކޮށްދިނުމާއި، އެފަރާތްތައް ބާރުވެރިކުރުވުމަށް ކުރެވޭ މުހިންމު މަސައްކަތެކެވެ. އަދި ހަމަ މިއާއެކު، އަނިޔާ ކުރާ ފަރާތްތައް ޒިންމާދާރު ރައްޔިތެއްގެ ގޮތުގައި އަނބުރާ މުޖުތަމައަށް ނުކުތުމަށް ބޭނުންވާ އެހީތެރިކަން ވެސް މި އެއްބަސްވެވުނު ފަހުމުނާމާގެ ތެރެއިން ކުރެވިގެންދާނެއެވެ.