ގެވެށި އަނިޔާ ހުއްޓުވުމުގެ ގާބިލުކަން އިތުރުކުރުމަށް ގއ. އަތޮޅުގެ މުއައްސާސަތަކަށް އަމާޒުކޮށްގެން ފެމިލީ ޕްރޮޓެކްޝަން އޮތޯރިޓީއިން ތަމްރީން ޕްރޮގްރާމެއްވަނީ ހިންގާފައިއެވެ. އޮކްޓޯބަރ މަހުގެ 20 ން 22 އަށް ގއ. ވިލިނގިލީގައި ކުރިއަށް ގެންދެވުނު މި ތަމްރީން ޕްރޮގްރާމުގައި ގއ. އަތޮޅުގެ މީހުން ދިރިއުޅޭ ހުރިހާ ރަށަކުން ގެވެށި އަނިޔާ ހުއްޓުވުމަށް މަސައްކަތްކުރާ މުއައްސަސާތަކުގެ ބޭފުޅުން ބައިވެރިވެ، ތަމްރީންވެފައިވެއެވެ.  

މި ތަމްރީން ޕްރޮގްރާމްގައި ޖުމްލަ 9 ރަށަކުން 54 ބޭފުޅުން ބައިވެރިވެފައިވެއެވެ. މީގެ ތެރޭގައި އަތޮޅު އަދި ރަށު ކައުންސިލް، ފުލުހުން، ފެމިލީ އެންޑް ޗިލްޑްރަންސް ސަރވިސް ސެންޓަރ، ސްކޫލް، އަންހެނުންގެ ތަރައްގީއަށް މަސައްކަތްކުރާ ކޮމިޓީ، ކޯޓުތަކުގައި މަސައްކަތް ކުރައްވާ ބޭފުޅުން، ހޮސްޕިޓަލް އަދި ހެލްތް ސެންޓަރުތައް އަދި 'އިބަމަ'ގެ މެމްބަރުން ހިމެނެއެވެ.

3 ދުވަހުގެ މުއްދަތަކަށް ކުރިޔަށް ގެންދެވުނު މި ތަމްރީން ޕްރޮގްރާމްގައި ޖުމްލަ 9 ސެޝަން ނަގައިދެވުނެވެ. މި ސެޝަންތަކުގައި އަލިއަޅުވާލެވުނު ބައިތަކަށް ބަލާލާއިރު، ގެވެށި އަނިޔާ ހުއްޓުވުމުގެ ގާނޫނާއި، ގެވެށި އަނިޔާ ހުއްޓުވުމުގައި މުއައްސަސާތަކުގެ ދައުރު، މިންތީގެ މަފްހޫމްތައް ދެނެގަތުން، އަނިޔާވެރި ގުޅުމަކުން ދުރުވުމަށް ހުރި ހުރަސްތައް ދެނެގަތުން، އަނިޔާ ލިބެން މެދުވެރިވާ ސަބަބުތަކާއި އޭގެ އަސަރުތައް، ރިފަރަލް އަދި ނެޓްވޯރކިންގް: ގެވެށި އަނިޔާގެ މައްސަލަތަކުގައި އެކުގައި ގުޅިގެން މަސައްކަތް ކުރާނެ ގޮތްތައް، އަނިޔާ ލިބިފައިވާ ފަރާތްތަކަށް އެހީތެރިވެދޭނެ ގޮތާއި އަނިޔާ ލިބިފައިވާ ފަރާތްތަކާ މުއާމަލާތްކުރާނެ ގޮތްތައް އަދި ވެލިއު ކްލެރިފިކޭޝަން ހިމެނެއެވެ.

ގެވެށި އަނިޔާ ހުއްޓުވުމުގެ ޤާނޫނު ގެ 52 ވަނަ މާއްދާގައި "ގެވެށި އަނިޔާގެ ޢަމަލެއް ހިނގާހިނދު، އެކަމަށް އިޖާބަދޭންޖެހޭ ހުރިހާ ރޮނގަކުން އިޖާބަދިނުމުގެ ޤާބިލުކަން އިތުރުކުރުމަށްޓަކައި ތަޢާރަފްކުރަންޖެހޭ މިންގަނޑުތަކާއި އުސޫލުތައް ކަނޑައަޅައި، އެކަންކަމާއި ގުޅޭގޮތުން އަޅަންޖެހޭ ފިޔަވަޅުތައް އެޅުން" މިއީ މި އޮތޯރިޓީގެ މަސްއޫލިއްޔަތެއްކަމުގައި ބަޔާންކޮށްފައިވެއެވެ. އެގޮތުން، މި ޕްރޮގްރާމަކީވެސް، ގެވެށި އަނިޔާއާ ދެކޮޅަށް މަސައްކަތްކުރާ މުއައްސަސާތަކުގެ ގާބިލުކަން އިތުރުކޮށް، ގެވެށި އަނިޔާގެ ޢަމަލުތަކަށް އިޖާބަދިނުން އިތުރަށް ހަރުދަނާ ކުރުމުގެ މަޤްސަދުގައި ހިންގުނު ޕްރޮގްރާމެކެވެ.